2Cor 4 | HUI | STEP | Ngode Datagaliwabehanda ina dara howa biabe ogoni buluma̱ya nginigo ina genda howa wahalu pole mitangi nabi howa bialu haramali.

a 4.12 Ko 3.6, 1 Ti 1.13

b 4.21 Ko 1.18, 2 Ko 2.17, 6.4, 6.7, 1 Te 2.3-5

c 4.31 Ko 1.18, 2 Ko 2.15, 2 Te 2.10

d 4.4Yo 1.18, 12.31, 12.45, 2 Ko 4.4, Eb 2.2, Pb 2.6, Kl 1.15, Hi 1.3

e 4.51 Ko 1.9, 1.13, 1.19, 1.23, 2 Ko 1.24

f 4.6Pig 1.3, Ais 9.2, 2 Ko 3.18, 1 Pi 2.9, 2 Pi 1.19

g 4.71 Ko 2.5, 2 Ko 5.1, 12.9

h 4.82 Ko 1.8, 7.5

i 4.10Lm 8.17, 1 Ko 15.31, Pb 3.10, 1 Pi 4.13

j 4.11Lm 8.36, 1 Ko 15.31, 15.49

k 4.13Iba 116.10, Lm 1.12, 2 Pi 1.1

l 4.14Lm 8.11, 1 Ko 6.14

m 4.151 Ko 3.21, 2 Ko 1.3-6, Kl 1.24, 2 Ti 2.10

n 4.16Lm 7.22, Eb 3.16, Kl 3.10, 1 Pi 3.4

o 4.17Md 5.12, Lm 8.17-18, 1 Pi 1.6

p 4.18Lm 8.24, 2 Ko 5.7, Kl 1.16, Hi 11.1-3

2 Corinthians 4

Abosolo agaliru ti be dindime wabinigo ale ka lenego ogo

1 Ngode Datagaliwabehanda ina dara howa biabe ogoni buluma̱ya nginigo ina genda howa wahalu pole mitangi nabi howa bialu haramali. ^a 2 Iname mini ko do howa bulenebi mana tagabi bulenebi erembira meremali. Iname wali agali mo hondo nahe Ngode Datagaliwabe bi mana mo tara howa nalami haramali. Wali agali bibahendenaga miniha tiga tiga manda bilo iname henene hangu lalu Ngode Datagaliwabenaga deni howa lamialu haramali. ^b 3 Bi mana debene lameramaligo wia do ho ngayagua wali agali hariga koha pialu karu manda nabilo wia do ho ngagoni. ^c 4 Dindini ko biaganaga haru haga ibugua wali agali uruninaga mini mo aruma kagola tigua Kerisohondo mini mbiraore nawi ka. Tiha wá harago ti de nahendelonaga ibugua mo ge haga ka. Wá holene ogoni Keriso ibu Ngode Datagaliwabe kagobi kagonaga wá taraore holene Bi Mana Debeneha howa ibalu wá halu ka. ^d 5 Iname inanenaga mana biaganego lameremali ndo. Iname Yasu Keriso ibu Anduane Homogoore ka lalubi Yasu mitangi bialu tínaga biabe bia haga ina kama lalubi ani lameremali. ^e 6 Ngode Datagaliwabehanda lalu, Arumaha howa wá hatagi ha, lenego ogoni ibugua inanaga bu miniha mo wá hole ibunaga wá holene heledagoni. Ngode Datagaliwabe ibugua ibunaga wá taraore holene Kerisonaga denguini howa wá hatagi harago ina manda buluma̱yanaga bira. ^f 7 Yasu Kerisonaga mana galoneore baya burugule ogoni yu kamaru ina nagalone be dindime wabini ale kama. Ani kamago irane hongo holene timbuniore tene ina ndo Ngode Datagaliwabe ibuniore ka inaha howa walia holenaga kamagoni. ^g 8 Ina tandaga naga bialu haramaligo inanaga hongo podalu ibira nahaga. Mini burugulo howa wahalu pu naberamali. ^h 9 Waitigi dewa kagolabi nenege mbira ha dege biaga. Marume ina bope haragola homa nabi kama. 10 Inanaga tinginiha howa Yasunaga holene wali agalime de hendelo iname horo bibahendeni inanaga tinginiha Yasunaga homolene yu haramali. ⁱ 11 Inanaga tinginiha howa Yasunaga holene walia helo iname Yasunaga biabe bia halu homolene kaware ngagoria haabo haramali. ^j 12 Ani bialu howa homoleneme inaha biabe bialu kagola holeneme tíha biabe bialu kagoni.

13 Anduane Homogonagambugani bi lo ngago ogo, I̱na Ngode Datagaliwabehondo mini mbiraore wu harugo bi latagi harugoni, lalu gilibu nga. Iname ogonidagua ibuhondo mini mbiraore wu howa bi latagi haramali. ^k 14 Ngode Datagaliwabehanda Anduane Homogo Yasu mo heya henego inabi mo heya halu tíbi inabi ibu kagoria haru polebira. Ani bulebiraore manda bu kamagoni. ^l 15 Ogoni bibahende tí mitangi bialu bulebira. Ngode Datagaliwabenaga biamogo bia holeneme wali agali dewaoreha ibalu karularagola tigua Ngode Datagaliwabenaga mini yaraga halu ibuhondo turu halu ka̱i̱ lalu holebira. ^m

Ngode Datagaliwabehondo mini mbiraore wialu holene ngago ogo

16 Irane ogoninaga iname genda howa wahalu polene mitangi nabi haramali. Ina dindinaga tingini holene goba halu kagola inanaga dinini holene horo bibahendengi mo gahenge halu ka. ⁿ 17 Iname tandaga emene tigi mbira áyu dege nalu kamagome maha wiaabobo holenaga bayale taraore holene tandaga emene áyu dege nalu kamagobi ndo bayale taraore holene timbuniore inahondo mo ngulebira. ^o 18 Iname mbirale deme handabehe ngaru ndo deme nahandabehe ngaru bayuwa mitangi bu kama. Mbirale deme hendedamaru wiaabo naholebira mbirale deme nahendedamaru wiaaboboore wulebira. ^p